பேருந்து கட்டண உயர்வைக் கண்டித்து, தமிழகம் முழுவதும் இன்று தி.மு.க செயல் தலைவர் மு.க.ஸ்டாலின் தலைமையில் ஆர்ப்பாட்டம் நடைபெற்றது. சென்னை மாவட்ட ஆட்சியர் அலுவலகம் அருகே நடைபெற்ற ஆர்ப்பாட்டத்துக்கு கனிமொழி எம்.பி தலைமை தாங்கினார்.
அப்போது அவர் பேசுகையில் " ஜீயர் ஆகவேண்டும் என்றால் அதற்கு ஒரு பயிற்சி இருக்கிறது என எனக்கு இன்றுதான் தெரியும். சோடா பாட்டில் அடிக்கணும், கல் அடிக்கணும். இதெல்லாம் தெரிந்துகொண்டால் தான், செய்யாவிட்டாலும் கூட நீங்கள் அந்த பதவிக்கு வர முடியும்.
ஜீயர் ஆவதற்கு இதுவரை ஜாதி ஒரு அடிப்படை தகுதியாக இருந்தது. வேறு சில தகுதிகளும் தேவையாக இருந்தது என்று நினைத்துக்கொண்டிருந்தேன். ஆனால் இப்பொழுதுதான் தெரிகிறது. அதற்கு அடிப்படை தகுதி என்னவென்று?'' இவ்வாறு அவர் பேசினார்.
கவிஞர் வைரமுத்துவுக்கு எதிராக நேற்று நடைபெற்ற கண்டன பொதுக்கூட்டத்தில் 'சோடா பாட்டில் வீசவும், கற்களை எறியவும் அஞ்ச மாட்டோம்' என, ஸ்ரீவில்லிபுத்தூர் ஆண்டாள் கோயில் ஜீயர் சடகோப ராமானுஜம் பேசியது குறிப்பிடத்தக்கது.
