ബിലാല്‍ ഒരുങ്ങുന്നു; ബിഗ് ബിയുടെ രണ്ടാം ഭാഗത്തില്‍ ഗോപി സുന്ദറും

ബിലാല്‍ എന്ന പേരില്‍ ഇറങ്ങുന്ന രണ്ടാം ഭാഗം ഉടന്‍ ഉണ്ടാവുമെന്നാണ് പുറത്ത് വരുന്ന റിപ്പോര്‍ട്ടുകള്‍. ഇപ്പോഴിതാ സംഗീത സംവിധായകന്‍ ഗോപി സുന്ദറും ചിത്രത്തിന്റെ ഭാഗമാകുമെന്ന് സൂചന നല്‍കിയിരിക്കുകയാണ്. സംവിധായകന്‍ അമല്‍ നീരദിനൊപ്പം നില്‍ക്കുന്ന ചിത്രമാണ് ഗോപി സുന്ദര്‍ പങ്കുവച്ചിരിക്കുന്നത്. 'ബിലാലിന് വേണ്ടി ഞാനും സഹോദരനും' എന്നാണ് ഫേസ്ബുക്കില്‍ പോസ്റ്റ് ചെയ്ത ചിത്രത്തിനൊപ്പം ഗോപി സുന്ദര്‍ കുറിച്ചിരിക്കുന്നത്.

ബിലാല്‍ ഉടന്‍ ഉണ്ടാവുമെന്ന് നേരത്തെ ഒരു ഫേസ്ബുക്ക് ലൈവില്‍ മമ്മൂട്ടിയും സൂചിപ്പിച്ചിരുന്നു. ഒരു ആരാധകന്റെ ചോദ്യത്തിന് ഉത്തരമായിട്ട്, 'ബിലാല്‍ വരും, തയ്യാറെടുപ്പുകള്‍ നടക്കുകയാണ്' എന്നാണ് മമ്മൂട്ടി മറുപടി നല്‍കിയത്.

അമല്‍ നീരദിന്റെ സംവിധാനത്തില്‍ മമ്മൂട്ടി നായകനായി 2007-ലാണ് ബിഗ് ബി റിലീസ് ചെയ്തത്. പുതുമയുള്ളതും സ്റ്റൈലിഷുമായ അവതരണത്തോടൊപ്പം ഉണ്ണി ആറിന്റെ ഹ്രസ്വവും ശക്തവുമായ ഡയലോഗുകളുമായിരുന്നു ചിത്രത്തിന്റെ പ്രധാന പ്രത്യേകതകള്‍. ഗോപി സുന്ദറായിരുന്നു ബിഗ് ബിക്കും പശ്ചാത്തല സംഗീതം ഒരുക്കിയത്. മമ്മൂട്ടിക്ക് പുറമെ മനോജ് കെ ജയന്‍, ബാല, നഫീസ അലി, സുമിത് നവല്‍, മംമ്ത മോഹന്‍ദാസ്, ഇന്നസെന്റ്, വിജയ രാഘവന്‍, പശുപതി തുടങ്ങിയവര്‍ മറ്റു വേഷങ്ങളിലെത്തി.